Këshilltarët e VMRO DPMNE-së dhe LSDM-së akuzuan kryetarin e Komunës së Strugës Ziajdin Sela se është duke majorizuar dhe diskriminuar maqedonasit në këtë qytet. Ata madje i shkruan letër edhe ambasadorit të SHBA-së Poll Uollers dhe atij të BE-së Aivo Orav, në të cilën thonë se maqedonasit në Strugën nuk mund të marrin pjesë në krijimin e strategjive për zhvillim dhe prosperitet në këtë qytet. Ata kërkojnë nga ambasadorët Uollers dhe Orav t'u dalin në ndihmë dhe të japin kontributin e tyre, siç thonë me qëllim që kreu i Komunës Sela në të ardhmen mos të lë hapësirë për nxitje të tensioneve ndëretnike.
"Disa herë kemi biseduar me kryetarin e Strugës Zijadin Sela dhe kemi kërkuar nga ai që të çlirohet nga prangat me të cilat është ngujuar, pasi në fakt edhe vetë funksioni i kryetarit të komunës flet se ai duhet të jetë babai i të gjithë qytetarëve që jetojnë në këtë komunë. Por kjo për fat të keq në Strugë nuk po ndodh", tha Gjoko Ilovski, këshilltar në Komunën e Strugës.
Këshilltarët maqedonas të koalicionit VMRO DPMNE -- LSDM vlerësojnë se kryetari i Komunës së Strugës Zijadin Sela po punon në kundërshtim me të gjitha parimet demokratike që vite me radhë implementohen në Maqedoni. Nga ana tjetër Sela sot nuk ishte i kapshëm për të komentuar akuzat e këshilltarëve maqedonas dhe letrën që ata i kanë dërguar ambasadorëve. Ndryshe këshilli Komunal i Strugës mbetet pa kryetar edhe dy muaj pas verifikimit të mandateve të këshilltarëve komunal. Në paraqitjen e fundit për media, kryetari i Komunës Ziadin Sela ka thënë se është i gatshëm që të shkojë në zgjedhje të parakohshme për këshillin komunal, por kandidaturën e Abdulla Qazimit nuk do e ndërroj deri në fund me asnjë emër tjetër. Valmir Kuçi
