Pr/ligji për mediat dhe ai për shërbime audio-vizuale kanë hyrë në procedurë parlamentare. Këto dy drafte kontestuese u dorëzuan para deputetëve, vetëm një javë pas miratimit në Qeveri dhe pa asnjë debat publik apo shqyrtim nga ekspertët vendorë dhe ndërkombëtar, duke mos përfillur as vërejtjet e Shoqatës së Gazetarëve. Opozita maqedonase kundërshtoi ashpër, duke kontestuar legjitimitetin e qeverisë për të krijuar një kornizë të mirëfilltë ligjore për sferën e mediave. Sipas saj, të gjitha nenet kontestuese në drejtim të kontrollit të mediave janë futur në Ligjin për media, që doli si ligj plotësues jashtë Ligjit për shërbime audio vizuele, i cili monitorohet nga Komisioni Evropian.
"A ia vlen që të debatojmë me njerëz të cilët rrahën dhe dëbuan gazetarët më 24 dhjetor, të cilët mbyllën televizionet dhe mediat e shkruara më me ndikim në Maqedoni. Qeveri e cila e solli shpifjen dhe ofendimin si metodë për vetë-censurë, Qeveri e cila lejoi të ulemi për 22 vende në vendin e 116, Qeveri e cila mban në paraburgim gazetarë për artikull që nga viti 2008, dhe Qeveri që nuk mblodhi forca të shkonte në varrimin e Nikolla Mlladenovit... Ky draft nuk është adaptuar as me Shoqatën e Gazetarëve, as me OSBE-në, as me rekomandimet e ekspertëve të Komisionit Evropian", tha Jani Makraduli, deputet i LSDM-së.
Ministri Ivo Ivanovski mohoi se OSBE-ja ka pasur vërejtje për versionin e ri të Ligjit.
"Që në fillim, Makraduli tha disa fakte se OSBE-ja tashmë ka komentuar këtë version. OSBE-ja ende nuk e ka komentuar zyrtarisht këtë version-draft. Atë që keni lexuar, ka qenë koment për versionin e vjetër, para se të mbanim takim në Vjenë me OSBE-në ku qartësuam shumë gjëra", deklaroi Ivo Ivanovski, Ministër i Shoqërisë Informative.
Mohimet e tilla të ministrit Ivanovski, sipas Makradulit, janë manipulime të opinionit, ose mungesë informimi e ministrit Ivanovski. OSBE-ja e komentoi versionin e ri, vetëm 2 ditë pas miratimit në Qeveri.
"Nuk besoj që ministri është aq i pa informuar, për faktin se OSBE-ja ka pasur kritika për herë të dytë, që u dhanë më 13 korrik e që referohen në ligjin që kaloi në seancën qeveritare të cilin ministri Ivo Ivanovski po e shpjegonte gjatë konferencës. Supozoj që shërbimet nuk e kanë fshehur këtë nga ai, kështu që, ai në këtë moment mundohet ta manipulojë publikun, sepse komentet që unë i lexoja ishin për versionin e dytë të dhënë më 13 qershor 2013, e që kanë të bëjnë konkretisht me këtë version për të cilin po flet Z. Ivo Ivanovski", u shpreh Jani Makraduli, deputet i LSDM-së.
OSBE-ja, në komentimin e dy draft-ligjeve të reja theksonte se ka ende paqartësi në klauzolën e shpifjes dhe ofendimit, në definicionin e gazetarit, vetë-rregullimin, në revokimin e licencës, kufizimet e pronësisë, agjencinë rregullatore të medias dhe mungesën e shoqërisë civile në këshillin drejtues të shërbimit publik. Benjamin Arifi
