Koce Trajanovski qëllimisht hakmerret dhe nuk ndërrmer masa për implementimin e gjuhës shqipe siç parashikon ligji në ndërrmarjet që janë nën ingerencë të qytetit për shkak se shqiptarët e Shkupit nuk e kanë votuar në zgjedhjet e fundit lokale, thonë për ALSAT-M burime brenda këshillit të qytetit. Komuna e Çairit ka qenë komuna e vetme ku Koce Tranajovski kishe humbur kundrejt kandidatit të LSDM-së opozitare, Jani Makraduli. Trajanovski në Çair kishte fituar 10 mijë e 864 vota kurse, Jani Makraduli 11 mijë e 208 vota. Kjo mund të jetë edhe arsyeja kryesore pse kryetari i Shkupit nuk kërkon nga drejtorët e ndërrmarjeve publike përfshirë edhe atë të Ndërmarrjes së Tranportit Publik të zbatoj në përpikshmëri përdorimin e gjuhës shqipe konform ligjit për gjuhën.
Ditë më parë edhe koordinatori i grupit të këshilltarëve të BDI-së Qemal Musliu haptas foli për neglizhencën nga kreu i qytetit Trajanovski rreth projekteve shqiptare.
'Ekziston ligji mirëpo ajo që buron nga ai po shihet qartë se nuk po respektohet edhe unë mendojë se kryetari i qytetit duhet tu bëjë presion më të madh drejtorëve përkatës për përdorimin decid të gjuhës shqipe konform ligjit. Bashkëpunimi i grupit të këshilltarëve të BDI-së me kryetarin e qytetit është në nivel mirëpo mund të them se kohën e fundit ka pak zhagitje për realizimin e projekteve për të cilat jemi marrë vesh', tha Qemal Musliu, këshilltarë në Këshillin e Qytetit të Shkupit.
Ndryshe nesër këshilli i qytetit të Shkupit pritet të debatoj mbi iniciativën e fundit të këshilltarëve të PDSH-së rreth moszbatimit të gjuhës shqipe dhe njëherësh shkarkimin e mundshëm të drejtorit të NTP-së Misho Nikollov.
Sot për të tretën ditë me radhë nuk pati asnjë reagim nga Ndërmarrja e Transportit Publik në Shkup, gjegjësisht nga drejtori i saj Misho Nikollov, lidhur me shkeljen e ligjit të përdorimit të gjuhëve në autobusët urbanë. Ai vazhdon të hesht dhe të jetë i pakapshëm për televizionin ALSAT-M. Ndaj tij në janar kishte ngritur padi edhe lëvizja qytetare 'ZGJOHU', por deri më tani prokuroria ka heshtur lidhur me këtë padi. Kujtojmë se në bazë të dispozitave ligjore në fuqi, drejtori i NTP-së, Misho Nikollov mund të ndiqet penalisht për shkeljen e ligjit të përdorimit të gjuhëve dhe mund të dënohet deri në 5 vjet burg, bazuar në nenin 138 të Kodit Penal. Valmir Kuçi
