Këshilli iniciues për lirimin e gazetarit Tomisllav Kezharovski me protesta në heshtje para Muzeut të VMRO-së do të shpreh pakënaqësinë kundër dënimit të gazetarit të "Nova Makedonijas". Shoqatat e gazetarëve të organizuara në këtë Këshill, i bëjnë thirrje gazetarëve dhe qytetarëve që të dalin në mbrojtje të lirisë së shprehjes dhe lirisë së mediave, dhe të veshur me të zeza të protestojnë në heshtje. Gazetari Aco Kabranov tha se goditja e tillë e Qeverisë duke shfrytëzuar gjyqësorin, është tentativë për heshtjen dhe frikësimin e gazetarëve në vend.
"Kur u arrestua u interesova kush është ai gazetar, sidomos kur publikoi në gazetën Nova Makedonija dy artikujt për tragjedinë e vdekjes së Nikolla Mlladenovit. Për mua ishte e çuditshme periudha kur aktualizohet çështje e vjetër 5 vite, përnjëherë, kur Kezharovski punon në çështje hulumtuese e cila në atë moment ishte tema numër një në tërë shtetin, dhe ishte përplot dyshime. Pajtohem me kolegët e mi se me këtë na dërgohet porosi gazetarëve të tjerë që të sjellim autocenzurë dhe frikë mes gazetarëve, 'shihni çfarë i ndodhi Kezharovskit, edhe ju do të ju gjejë e njëjta'", tha Aco Kabranov, gazetar.
Në shenjë proteste për Kezharovskin, Shoqatat e gazetarëve ndërprenë dialogun me Qeverinë. Një ndër kushtet për vazhdimin e dialogut ishte edhe falja e Kezharovskit, kërkesë e cila nuk u shqyrtua nga Ministria e Drejtësisë. Nga ana tjetër zv/kryeministri Fatmir Besimi tha se është e rëndësishme që të vazhdohet dialogu me gazetarët, pa precizuar nëse një gjë e tillë mund të bëhet së shpejti.
"Me rëndësi është që të vazhdojmë dialogun me gazetarët dhe këtë ta rrisim në nivel të takimeve të rregullta, me qëllim që të mund të përfitojnë edhe institucionet e shtetit por edhe vetë gazetaria, në drejtim të përmirësimit të cilësisë, standardeve, si në aspekt të kornizës ligjore, po ashtu edhe në aspekt të kritereve që kanë të bëjnë me etikën dhe profesionalizmin e gazetarëve", u shpreh Fatmir Besimi, zv/kryeministër.
Organizata të ndryshme që mbrojnë dhe përcjellin lirinë e mediave në botë dhe Evropë kanë reaguar kundër dënimit të gazetarit Tomisllav Kezharovski. Gazetari i Nova Makedonijas u dënua me 4 vjet e gjysmë nën akuzën se ka zbuluar identitetin e dëshmitarit të fshehur në rastin "Oreshe", edhe pse sipas Kezharovskit, në kohën kur ai ka publikuar artikullin kontestues, nuk ka pasur statusin e dëshmitarit të fshehur. Benjamin Arifi
