LSDM-ja është kundër masave të Drejtorisë së të Ardhurave Publike, për mbylljen e menjëhershme të bizneseve të vogla. Sipas tyre qeveria po luan me fatin e pronarëve dhe punëtorëve të bizneseve të vogla, të cilëve iu kërcënohet mbijetesa. Si zgjidhje për këtë problem LSDM-ja propozon një masë të re me të cilën firmat që nuk punojnë sipas normave ligjore nuk do të mbyllen direkt por fillimisht do të ketë paralajmërime dhe gjoba.
"Frika dhe kërcënimet ndaj qytetarëve po identifikojnë VMRO-DPMNE-në. Dora e zgjatur e Nikolla Gruevskit përmes përmbaruesit të Drejtorisë së të Ardhurave Publike Goran Trajkovski arriti tek dyqanet lokale, shitoret, berberhanet, kafenetë etj, madje edhe tek mikro-firmat me nga dy punëtorë. Veçanërisht ditët e fundit, këto subjekte të vogla të cilët mezi mbijetojnë, janë vënë në agjendën e DAP-it. Atyre iu shkruhen dënime prej mijëra eurosh që munden vetëm t'i ëndërrojnë t'i fitojnë", tha Petre Shilegov, zëdhënës i LSDM-së.
Nga partia opozitare thonë se aksione të tilla, janë të qëllimshme për të mbushur arkën e shtetit, në mënyrë që partia në pushtet të mbulojë humbjet e mëdha që ka pësuar buxheti.
"Dënimet për kundërvajtje janë të paramenduara si një instrument ligjor për respektimin e normave ligjore. Por Gruevski dhe VMRO-DPMNE-ja këtë instrument ligjor e kanë shndërruar në instrument fiskal i cili po keqpërdoret për mbushje të buxhetit dhe fondit pensional të zbrazët", u shpreh Petre Shilegov, zëdhënës i LSDM-së.
Sipas LSDM-së, gjatë 6 viteve të fundit pushteti ka mbledhur nga gjobat drastike, rreth 8 miliard denarë. Ferikan Iljazi
