Është mbyllur konkursi për 141 nëpunësit shtetërorë që duhet të pranohen në Sekretariatin për Implementimin e Marrëveshjes së Ohrit. Me këtë është përmbyllur edhe faza e dytë e programit të Qeverisë për përfaqësimin e drejtë dhe adekuat, duke rumbullaksuar numrin prej 400 punësimeve për vitin 2013. Kandidatët konkurojnë në 3 nivele, edhe atë 1 këshilltarë shtetërore, 100 bashkëpunëtorë më të rinj për strategji dhe 40 referentë të rinj për strategji. Sipas zëdhënësit të Qeverisë, për 141 vende pune kanë konkuruar numër i madh qytetarësh.
"Të premten ka përfunduar afati për të gjithë të interesuarit të cilët kanë aplikuar për vendin e punës të shpallur në shpallje publike nga Sekretariati për Implementimin e MO-së. Ky konkurs është faza e dytë e realizimit të Programit për përfaqësim të drejtë dhe adekuat, pasi Qeveria për çdo vit miraton Programin për përfaqësimin e drejtë dhe adekuat, që ka për qëllim punësimin në nëpunësa shtetërorë të shqiptarëve dhe bashkësive të tjera më të vogla. Sipas informacioneve që kemi nga Agjencia për administratë, atje ku edhe bëhet aplikimi, numri i të interesuarve është shumë i madh", tha Muhamet Hoxha, zëdhënës i Qeverisë.
Edhe përkundër programeve vjetore për punësime të Sekretariatit që nga viti 2008, prej kur punësohen prej 400 deri 600 nëpunësa të rinj në vit, përfaqësimi i drejtë dhe adekuat i shqiptarëve në administratën publike rritet ngadalë. Sipas Sekretariatit, ngecja e tillë në arritjen e kuotës prej 25%, nga rreth 18 përqindëshi aktual, është pasojë e punësimeve masive të maqedonasve në administratë. Madje, punësimet në administratë nga partia maqedonase në Qeveri janë përdorur si masë kundër varfërisë dhe papunësisë, gjë e cila është kritikuar nga Komisioni Evropian në Raportin e fundit të progresit për Maqedoninë. Benjamin Arifi
