Këshilli për Radiodifuzion prej kohësh nuk është i pavarur, ndërkohë që vendimet e tanishme miratohen nën ndikimin e politikës. Kështu u shpreh për Alsat, ish kryetari i KRD-së Mirçe Adamçevski sipas të cilit Këshilli nuk është dashur të merrte vendim për vërejtje ndaj TV Alsat, në mungesë të anëtarëve shqiptarë dhe pa përbërjen e plotë të tij. Nga ana tjetër analisti Alajdin Demiri vlerëson se me vërejtjen drejtuar TV Alsat-it, KRD-ja vetëm se ka dëshmuar që është një instrument shumë i fuqishëm në duart e pushtetit, nën udhëheqjen e plotë të VMRO-së.
"Krijohet përshtypja se dikush, kokë më vete ka marrë vendim... tani ka qenë apo jon në presion është pak me rëndësi. Nuk është dashur të merret një vërejtje e tillë në përbërje jo të plotë të Këshillit. Këshilli është koalicion politik që nuk është mirë për të, ndërkohë që e dimë se bëhet fjalë për trup të pavarur rregullator dhe jo trup politik. Sipas meje, këshilli nuk funksionon si trup i pavarur, për shkak se në vitin 2011 u krye një ndërhyrje në Këshill ku erdhën persona partiakë dhe e shndërruan Këshillin në parlament, në vend që të jetë trup i pavarur rregullator", tha Mirçe Adamçevski, ish kryetar i KRD-së.
"Sjellja e KRD-së, në rastin e Alsatit është një tendencë shumë e hapur dhe tendencë e dënimit dhe diskriminimit të gazetarisë. Arroganca e pushtetit e pacipë kësaj radhe, tregoi fytyrën e vet, mirëpo ajo që është e rëndësishme është fakti se kjo më tepër ishte porosi edhe për gjithë të tjerët. Porosi ishte për arsye se, kur e mori guximin Alsat-i si një televizion dygjuhësh edhe më i çelur, dhe më i hapur, ta akuzoj për nacionalizëm do të thotë se problemi është serioz. Nacionalizmin e vet e institucionalizon dhe tenton që tjerët t'i disiplinoj. Mendoj se kësaj radhe ishte porosi e hapur për gazetarinë shqiptare e cila duhet të disiplinohet dhe e cila duhet të punoj sipas diktatit të shtetit". Alajdin Demiri, analist politik.
Teksa komenton braktisjen e mbledhjes nga anëtarët shqiptarë, Demiri thekson se të njëjtën gjë duhet t'a bëjnë shqiptarët në Kuvend dhe Qeveri.
"Largimi i anëtarëve shqiptarë, është i mirë që do të thotë se është një bojkot. Mirëpo ky largim duhet të jetë i koordinuar dhe madje, i koordinuar edhe me organet e tjera dhe institucionet e tjera siç është parlamenti, qeveria etj. Për arsye se nëse ngelet vetëm në suaza të KRD-së, ajo do të margjinalizohet dhe mendoj se nuk do të qëndrojnë gjatë. Këtë e di pushteti, kështu që ky largim nëse e quajmë bojkot, nëse është sistematik dhe është më i gjatë do të jetë një porosi se si duhet të veproj politika në tërësi", deklaroi Alajdin Demiri, analist politik.
Dy ditë më parë, kryetari i KRD-së Trajçevski nisi një komunikatë për të cilën nuk u konsultua me askënd nga brenda Këshillit. Në të, thuhej se Televizioni ALSAT-M, gjatë informimit të tij duhet të respektojë standardet profesionale gazetareske dhe t'i shmanget shfrytëzimit të sensacionalizmit, me qëllim të mos nxiten tensione ndëretnike. Bedri Rexhallari
