Ekziston vullnet politik për mbajtjen e mbledhjeve të përbashkëta qeveritare mes Maqedonisë dhe Shqipërisë. Mbetet të punohet në modalitetet teknike që ky vullnet politik të shndërrohet në realitet. Kështu deklaruan sot në Tiranë dy zv/kryeministrat Musa Xhaferi dhe homologu i tij shqiptar Niko Peleshi. Në këtë drejtim Xhaferi mori inkurajim edhe nga kryeministri i Shqipërisë Edi Rama.
"Shkupi zyrtarisht e ka deklaruar qëmoti se është i gatshëm politikisht me të gjithë fqinjët.... ekzistojnë shumë tema të përbashkëta, shumë projekte, ka qëllime të përbashkëta në të gjitha sferat...Unë shpresoj se në të ardhmen ne do ti përgatisim të gjitha elementet përcjellëse teknike që ky bashkëpunim të bëhet", deklaroi Musa Xhaferri, zv kryeministër i Maqedonisë.
"Kemi folur me zv/kryeministrin edhe për mundësinë e zhvillimit të një mbledhje të dy kabineteve me qeverinë e Maqedonisë jemi të gatshëm nga ana jonë kemi marrë edhe gatishmërinë e palës maqedonase për të projektuar në të ardhmen pse jo një mbledhje të përbashkët të ngjashme me atë të Kosovës", tha Niko Peleshi, zv/kryeministër i Shqipërisë.
Gjatë qëndrimit në Tiranë Xhaferri u takua edhe me kreun e Kuvendit Ilir Meta, me të cilin u ndanë qëndrimet për integrimin e mbarë rajonit.
"Shqiptarët e Maqedonisë meritojnë një progres më të shpejt. Ata kanë qenë një shembull i angazhimit për proceset integruese të Maqedonisë si në drejtim të anëtarësimit në NATO dhe në BE që suksesi i implementimit të MO-së është gjithashtu një tregues i rëndësishëm i vetë evropianizimit të Maqedonisë", u shpreh Ilir Meta, kryetar i Kuvendit të Shqipërisë.
Paraprakisht, zv/kryeministri Musa Xhaferi u prit edhe nga Presidenti Bujar Nishani, ku gjithashtu u fol për implementimin e marrëveshjes së Ohrit dhe euro-integrimin e dy vendeve.
Nga Tirana për Tv Alsat-Bedri Rexhallari.
