Zgjedhjet e parakohshme parlamentare, bazuar në sondazhet e fundit të cilat në vazhdimisht nxjerrin fitues koalicionin aktual qeverisës, do të ishin të pakuptimta dhe vetëm se do t'i shtonin jetën atij. Sipas analistit Ismet Ramandani, BDI-ja nuk duhet të pranojë zgjedhje të parakohshme, nuk duhet të hyjë në një aventurë të tillë, por duhet të ndërtoj strategji se si të rrëzojë nga pushteti VMRO DPMNE-në e cila po zbaton politikë anti-shqiptare. Ramadani madje thekson se një taktikë është edhe orientimi i drejt mbështetjes së kandidatit opozitar maqedonas, nga ana e shqiptarëve.
"BDI-ja duhet të luaj një rol pak më ndryshe...Në çdo mënyrë duhet të gjej forma që të tërhiqet nga pushteti ose të largohet nga partia e Gruevskit, për shkak se është e qartë për qytetarët shqiptarë se ajo parti në krye me Gruevskin tërë konceptin e ka antishqiptar, anti-evropian, anti-NATO dhe nuk është e gatshme të bëjë kompromise për të hapur rrugën e integrimeve", deklaroi Ismet Ramadani, analist politik.
Edhe profesoresha Mirjana Malevska vlerëson se nuk ka arsye për mbajtjen e zgjedhjeve të parakohshme parlamentare. Sipas saj, zgjedhjet e parakohshme do të shpërqendronin vëmendjen edhe nga zgjedhjet e rregullta presidenciale, që ndërlidhen shumë me politikën e jashtme.
"Sipas mendimit tim nuk është mirë, sepse tani kemi zgjedhje presidenciale. Diskutimi rreth kandidatit dhe tema kryesore do të jetë politika e jashtme e Maqedonisë, probleme që ne, i kemi më së shumti me grekët, bullgarët e kështu me radhë. Në rast se njëkohësisht mbahen edhe parlamentaret, diskutimi për politikën e jashtme të Maqedonisë shkon në plan të dytë", tha Mirjana Malevska, profesor universitar.
Dita-ditës po shtohen zërat se zgjedhjet e parakohshme parlamentare janë gjithnjë e më afër. Subjektet politike thonë se nuk janë për zgjedhje të parakohshme parlamentare, por gjithsesi, janë të përgatitur për to. Bedri Rexhallari
