Rrugë të zbrazëta, kontejnerë të përmbysur dhe shumë mbeturina. Në Bosnjë sot situata është e qetë. Po pastrohet dhe po llogariten dëmet. Më shumë se 200 persona të lënduar dhe disa ndërtesa qeveritare të djegura është çmimi që e paguan boshnjakët për të detyruar dorëheqjen qeverive të kantoneve të Tuzllës, Zenicës e Dobojit. Incidentet i dënoi edhe kryetari e Kryesisë së BeH, Zheljko Komshiq. Ai tha se kryengritja është e justifikueshme, porse shkatërrimi i pasurisë dhe rrezikimi i jetës së qytetarëve është e papranueshme. Një vlerësim për zhvillimet e djeshme dha edhe ministri i Sigurisë së Bosnjë dhe Hercegovinës, Fahrudin Radonçiq.
"Ky është rezultat i pushtetit të korruptuar tashmë 17 vjet. Ato janë 17 vitet e privatizimit të shkatërruar, të kompanive të shkatërruara. Po them me përgjegjësi se në rrugë më shumë ishin fëmijët, prindërit e të cilëve nuk kanë para as për bukë", deklaroi Fahrudin Radonçiq, ministër i Sigurisë i BeH.
Përfaqësuesit e punëtorëve të firmave të falimentuara thonë se me dorëheqjen nga pushteti në Tuzllë është përmbushur kërkesa e parë e protestuesve dhe se janë krijuar kushtet për formimin e qeverisë teknike me anëtarë jo partiak, që do të çojë kantonin në zgjedhje në vitin 2014. Punëtorët kërkojnë edhe sanksione për krimin ekonomik, konfiskimin e pasurisë së fituar në mënyrë të paligjshme dhe anulimin e kontratave për privatizimin. Këto kërkesa tashmë po i shqyrton qeveria federale. Hapat që do të ndërmerren për formimin e pushtetit në kantonet ku qeveritë dhanë dorëheqje, pritet që të dihen gjatë ditëve të ardhshme. Petar Bllazhevski
