Kultivuesit e duhanit nga Studeniçani akuzojnë kompanitë 'Soko Tap' dhe 'Aliansa' se nuk po respektojnë marrëveshjet e nënshkruara individuale për blerjen e duhanit. Duhanxhinjtë madje ditë më parë bllokuan edhe pikën e blerjes së duhanit në fshat. Një banor i moshuar i Studeniçanit thotë se nga duhani mban familjen e tij, ndërsa akuzoi për blerje selektive të duhanit.
"Gjithë shtëpinë e ruaj me këtë duhan. Asgjë nuk kam mbjellë, as grurë asgjë, vetëm ke këtë duhan. E kam dërguar një pjesë të duhanit edhe ma kanë mbyllur kontratën. Tani ku të shkoj, ku të mbytem. Harxhimet ende nuk i kam paguar, që kam marrë arat me qira, lëvrimin, punën. Kalbet, prishet duhani, e shef si mundohem", tha Jashar Ademi, kultivues duhani.
'Gjendem në fshatin Studeniçan ku për disa ditë me radhë banorët e këtij fshati janë të revoltuar për mos blerjen e duhanit të tyre. Ky duhan që po mbaj në dorë ka disa ditë që ka filluar të kalbet'.
'Ne kemi thirr edhe nga ministria, nga inspektorati por ata sikur i mbrojnë ato, ndërmarrjen Soko Tap. Neve ende e kemi këtë problem se duhani na ka ngelur nëpër shtëpia', deklaroi Xhevat Saliu, përfaqësues i shoqatës së duhanxhinjëve Studeniçanit.
'Unë kam pasur kontratë që të prodhoj 1400 kilogram, dhe i kam prodhuar 1400 kilogram mirëpo në kontratën që ma ka dhënë ndërmarrja për grumbullimin e duhanit më ka dhënë 800 kilogram. Pjesa tjetër mua më ngelë"
"Ata po na gënjejnë, do ta marrim mirëpo rrinë në tavan. Çka do ti bëj kësaj unë tani, kurse prej kësaj e kemi jetesën"
'Unë nuk desha të hyjë në atë se qeveria apo kombinati e ka fajin, mirëpo faji është i pashëm dhe shihet ku është. Ministria si qeveri duhet ti përcjell rrjedhjet e nënshkrimeve të kontratave mes prodhimtarëve dhe kombinatit. Qeveria duhet tua gjejë zgjidhjen këtyre prodhuesve", thonë kultivuesit e duhanit.
Banorët e Studeniçanit ankohen edhe për çmimin e ulët për blerje të duhanit. Banorët e Studeniçanit paralajmëruan se duhanin do ta shesin edhe nëpër rrugë nëse shteti nuk ua blen, dhe do të bllokojnë përsëri pikën grumbulluese nëse pushteti nuk i del përballë këtyre kërkesave. Ferikan Iljazi
