13 persona që të gjithë anëtarë të një familje, janë arrestuar gjatë një aksioni policor në Kumanovë dhe rrethinë. Rrugëve të Kumanovës gjatë aksionit ka pasur numër të madh të pjesëtarëve të policisë. Zëdhënësi i policisë Ivo Kotevski njoftoi se personat e arrestuar dyshohen të kenë kryer vepra që kanë të bëjnë me krimin e organizuar, pastaj tregti me lëndë narkotike, me armë zjarri, pastrim parash si dhe nënë dyshimin se kanë dhënë para me kamatë. Sipas policisë, të arrestuarit dyshohen se që nga viti 2004 kanë kryer vepra të rënda brutale dhe me këtë i kanë siguruar vetes pasuri të madhe në të holla dhe patundshmëri kundërligjore.
"Një pjesë të madhe të këtyre parave ky grup kriminel i ka fituar nëpërmjet tregtisë ilegale me lëndë narkotike, përkatësisht me shitje të heroinës në Zvicër. Deri më tani janë arrestuar 13 persona, që të gjithë anëtarë të një familjeje nga Kumanova. Veprat për të cilat akuzohen të arrestuarit dhe deri më tani janë dokumentuar janë bashkim kriminel, tregti ilegale me lëndë narkotike, pastrim parash dhe për krim të dhunshëm, d.m.th bëhet fjalë për vepra që kanë sjellë përfitim të madh këtij grupi të organizuar kriminel", tha Ivo Kotevski, zëdhënës i MPB-së.
Mësohet se i dyshuari kryesor në tentim për të ikur nga policia ishte fshehur në kulmin e shtëpisë dhe kishte refuzuar të dorëzohet. Policia ka kryer kontrolle në disa shtëpi dhe objekte ku dyshohet se të arrestuarit kanë kryer veprat. Kotevski tha se deri më tani janë siguruar një numër i madh i lëndëve të cilat do të shfrytëzohen si provë gjatë procedurës së mëtejme. Valmir Kuçi
