Zgjatet afati për vendosjen e filtrave nëpër oxhaqe të Kompanive të mëdha. 'Makstil' në Shkup dhe 'Jugohrom' në Tetovë tani për tani, shpëtuan nga mbyllja e fabrikave. Qeveria në seancën e fundit i shqyrtoi kërkesat e tyre për zgjatjen e afateve dhe mori vendim që atyre t'iu jepet edhe një shans tjetër. Afati i ri është caktuar 31 tetori.
"Në bazë të të gjitha procedurave ne këtë si ministri këtë e kemi dërguar edhe në qeverinë e Republikës së Maqedonisë ku në seancën e fundit u diskutua dhe u vendos që për dy kapacitet metalurgjike ky afat të prolongohetnë bazë të kërkesës së tyre dhe argumenteve që ata i dërguan në qeveri deri më 31 tetor të këtij viti", tha Abdulaqim Ademi, Ministër i Mjedisit dhe Planifikimit Hapësinor
Edhe krahas afatit të ri, të gjitha kompanitë, ku deri më tani nuk është respektuar afati i përcaktuar më parë, do të gjobiten, varësisht se deri ku kanë arritur edhe me aplikimin e standardeve ekologjike, kurse dënimet do të arrijmë edhe deri në 100 mijë euro.
"Ndërkohë inspektorati për mjedisin jetësorë do të bëj kontroll tek të gjitha kapacitete dhe të gjithë ata që nuk i kanë arritur ti implementojnë afatet për planet operative do ti ndëshkoj në bazë të ligjit edhe atë deri në 100mijë euro. Kurse për gjithë ata që nuk janë pajisur me lejet ekologjike do të ketë edhe një afat plotësues prej 90 ditëve që ta bëjnë atë", tha Abdulaqim Ademi, Ministër i Mjedisit dhe Planifikimit Hapësinor.
Lejet e integruara "A" ekologjike duhet ti kenë rreth 130 kompani në vend. Vitin e kaluar, kryeministri Gruevski, në paraqitjen vjetore para biznesmenëve, porositi se shëndeti i qytetarëve është më i rëndësishëm se fitimet e kompanive. Megjithatë, tani në periudhën para zgjedhjeve, Qeveria vendosi që atyre t'iu japë një shans të ri prej gjysmë viti. Natasha Stojanovska
