Qyteti bregdetar i Durrësit është gdhirë këtë të mërkurë me erë të fortë dhe vranësira të dendura. Erërat e forta në formën e një stuhie detare, kanë sjellë probleme në ankorimin e trageteve në portin e Durrësit.
Kështu dy tragete të linjës Bari-Durrës, përkatësisht me 197 dhe 235 pasagjerë, në total (432) nuk kanë mundur të ankorohen, për shkak të dallgëve të mëdha në det.
Burime nga kapitaneria e Durrësit thonë se dy tragetet kanë mbërritur pranë portit që në orën 8 të mëngjesit, por ende po qëndrojnë në radën e jashtme në pamundësi për t?u ankoruar.
Edhe Vlora po përballet sot me mot të trazuar, ku për pasojë është pezulluar lundrimi në det për mjetet e peshkimit . Dallgët arrijnë deri në 5 ballë brenda gjirit, ndërsa 6-7 ballë në det të hapur.
