Subscribe në Ora News këtu http://bit.ly/1s5j7UT
Gjergj Kastrioti është jo vetëm hero i shqiptarëve por dhe një prezencë e përditshme urbanistike e kryeqytetit italian.
Duke shëtitur në rrugët e Romës mes ndërtesave antike, jo shumë larg Koloseut e qëndrës historike të qytetit, ndeshesh me monumentin "Skendërbe", pallatin "Skëndërbe", rrugica "Skëndërbe", sheshi "Skëndërbe", sheshin "Shqipëria", Monumenti "Skëndërbeu" në Romë e sheshi "Albania".
Në 27 tetor të vitit 1940, Benito Musolini, në praninë e autoriteteve më të larta zyrtare të qytetit inauguroi në Romë Monumentin e Skëndërbeut.
Mediat e kohës e komentojnë si një ditë vjeshte e shiu të fortë. Monumenti u vendos në atë që dikur quhej sheshi "Raudusculana", emri i një porte antike të mureve Serviane.
Por në 4 korrik të 1940, për të kujtuar aneksimin e Shqipërisë nga Mbretëria italiane (më 16 prill 1939) vendosi që ky shesh të ndryshoi emër, dhe u quajt "Albania".
Gjendet në zemrën e Romës antike mes lagjes San Saba e Aventinos, një nga shtatë kodrat ku sipas legjendës u themelua qyteti. Monumenti i Skndërbeut u realizua nga skulptori fiorentin Romano Romanelli.
Lindur më 14 maj të vitit 1882 në Firence, ky artist, mik i poetit Gabriele D'Annunzio, rridhte nga një familje skulptorësh. Njëkohësisht ai ishte dhe një funksionar i lartë i Marinës italiane.
Aftësitë e tij artistike por dhe lidhjet me shtresën e lartë të politikës italiane të asaj kohe, i ngarkuan detyrën e realizmit të monumentit të heroit Kombëtar të Shqipërisë, në kryeqytetin italian Romë, në sheshin me emrin e vendit fqinj dhe në atë moment kaq të veçantë e historik për dy vendet.
Monumenti i Skëndërbeut është realizuar mbi një grup bronxi i rëndë 35 kuintalë. E paraqet heroin tonë kombëtar mbi kalin e tij të pandashëm, veshur nën armaturën e hekurt, me përkrenaren e shpatën gati për luftim.
Guvernatorit të Romës (funksionari më i lartë administrativ i qytetit në epokën e fashizmit) iu kërkua që brenda pak kohe të siguronte bazamentin mbështetës të veprës së Romanellit, tashmë i përfunduar e gati për inaugurim.
Brenda 26 ditësh u sigurua piedestali i gurtë, i tipit travertino që peshonte rreth 75 kuintalë. Së bashku formojnë Monumentin e Skëndërbeut në Sheshin "Albania" ku më vitin 1968 me rastin e 500 vjetorit të vdekjes së Gjergj Kastriotit Skëndërbe, Komuna e Romës vendosi pllakën përkujtimore.
Për më shumë lexoni në:
http://oranews.tv/article/skenderbeu-i-romes
