Agjencia Kombëtare e Zonave të Mbrojtura ka inventarizuar për herë të parë 40 speciet e jetës së egër më të rrezikuara në Shqipëri.
Në listën e këtyre specieve është rrëqebulli, ariu, ujku, dhia e egër, kaprolli dhe pelikani, por edhe shumë individë të tjerë të cilët për shkak të gjuetisë së paligjshme dhe prerjes së pyjeve ishin drejt zhdukjes.
Sipas kreut të kësaj agjencie, Zamir Dedej në Shqipëri janë prezent mbi 80 lloje gjitarësh dhe mbi 320 lloje shpendësh
Zamir Dedej, kreu i AKZM-së: Janë rezultate që vlerësojnë faunën e egër, psh: tek arinjtë kemi arritur deri në 200 arinj që janë në Shqipëri. Duam të gjejmë sa më shumë dhe ku ndodhet rrëqebulli. Kemi rikthim të disa specieve që nuk janë gjendur përpara dhe identifikimin e specieve të reja, si shqiponja e skifteri që janë parë. Në Gjirokastër, kemi parë një skifter këmbëverdhë që është parë dhe prezenca e tij është në 23% të popullatës europiane. Është vënë re kali i qyqes që është rikthyer në zonën e Drinos.
Sipas Dedejt, në këtë fazë tashmë ka ardhur koha që dhe Shqipëria të ketë Qendrën e vet të reabilimit të arinjve dhe është menduar që kjo qendër të jetë në Parkun Kombëtar të Dajtit.
Zamir Dedej, kreu i AKZM-së: Jemi në fazën e kërkimit të tokës me një sipërfaqe prej 10 hektar dhe një infrastrukturë tepër moderne, me një investim prej 2-3 milion euro. Është një investim i konsiderueshëm, jemi në kërkimin e tokës shtetërore për të ulur koston e ndërtimit, por të jetë edhe afër mundësisë së vizitimit.
Objekt i këtij inventarizimi fillimisht u caktuan 30 specie, të cilat janë parë si objekte gjuetie dhe disa të tjera si të kërcënuara.
Gjatë inventarizmit u vunë re edhe 27 specie të tjera, prej të cilave janë përzgjedhur edhe specie për t?u inventarizuar gjatë këtij viti në habitatet e Prespës, Pogradecit dhe Liqenit të Shkodrës, por edhe në lagunat bregdetare.
