Asnjë pagë prej gati 1 viti. Futbollistët e Vllaznisë B nuk kanë duruar më, duke bojkotuar stërvitjen e së martës. Ata u paraqitën në fushën ?Reshit Rusi?, por për të protestuar madje duke kërcënuar edhe për bojkot të takimit me Tërbunin të shtunën, që është tepër i rëndësishëm për mbijetesën në Kategorinë e Parë.
"Kemi menduar gjatë të gjithë javës dhe vendosëm të mos dalim sot në stërvitje. Kemi biseduar me njëri-tjetrin dhe paralajmërojmë edhe bojkotimin e ndeshjes, nëse nuk jepet një zgjidhje e shpejtë".
Futbollistët thonë se nuk po gjejnë zgjidhje, madje lëvizjet për ndeshjet jashtë i kanë paguar vetë.
"Kemi biseduar me administratorin Astrit Gjyrezi, na ka thënë që nuk ka fonde. Jemi si jetimë në këtë ekip dhe kemi shkuar kudo me shpenzimet tona".
Vllaznia B është i vetmi ekip i dytë i një klubi që merr pjesë në Kategorinë e Parë. Klubi shkodran nuk ka reaguar ende zyrtarisht ndaj këtyre akuzave.
