"Kur kanë mbetur vetëm pak ditë nga përfundimi i procesit të vetëdeklarimit të punonjësve të policisë, vetëm gjysma e tyre kanë arritur të depozitojnë vetëdeklarimet. Pjesa tjetër pritet t?i deklarojnë në ditët në vijim. Ata që nuk do të arrijnë të kryejnë dorëzimin e formularëve nuk përjashtohet mundësia që ta shohin veten jashtë radhëve të policisë".
Në drejtoritë e Policisë vijojnë të depozitohen formularët. Ky efektiv thotë se e ka plotësuar normalisht vetëdeklarimin dhe se nuk ka pasur probleme. Burime nga Drejtoria e Policisë së Tiranës thonë se deri paraditen e të enjtes e kanë depozituar vetëdeklarimin 1020 efektivë policie.
Në total Drejtoria Vendore e Policisë së Tiranës numëron rreth 2 mijë efektivë dhe personel civil që do të jenë pjesë e vlerësimit.
Afërsisht 90 punonjës policie kanë kërkuar që të largohen nga radhët e policisë, shumë prej të cilëve për shkak të procesit të vetting-ut.
Burimet thonë se pjesa më e madhe janë mbi moshën 50 vjeç. Në total, në të gjithë vendin pritet të dorëzojnë formularët e vetëdeklarimit deri të hënën, mbi 10 mijë efektivë.
