Dy policët Gjolekë Hodaj dhe Granit Zani, janë dy efektivët e policisë së paraburgimit të Vlorës të cilët shoqëronin në Gjykatë të mërkurën të arratisurin Mikel Kasa.
Të dy ata u shoqëruaun mesditën e së mërkurës në ambientet e Drejtorisë së Policisë së Vlorës, menjëherë pas arratisjes së të pandehurit Kasa.
Burime zyrtare të policisë dhe prokurorisë së Vlorës thanë se pas informacionit të përcjellë nga prokurori Saimir Smaka, nisën hetimet lidhur me arratisjen e Mikel Kasës. Dy efektivët e policisë së burgjeve, Gjolek Hodaj dhe Granit Zani, akuzohen për shkelje të rregullave të shërbimit me pasojë largimin e të dënuarit nga vendi i qëndrimit.
Siç shihet edhe në pamjet e kamerave të sigurisë së Gjykatës së Vlorës, dy efektivët e policisë kanë qëndruar larg të pandehurit. Ata janë afruar vetëm kur gjyqtari thuajse kishte cituar vendimin e dënimit të dhënë ndaj Kasës. Në këtë moment, ky i fundit kapërceu mbi tavolinën ku ishte ulur dhe u largua nga një prej dyerve të sallës së gjyqit.
Pavarësisht se policët e ndoqën për ta ndaluar, ata nuk mundën ndërsa Kasa u largua nga Gjykata me shpejtësi. Ky i fundit tashmë po kërkohet në të gjithë Vlorën, por deri më tani nuk ka asnjë informacion mbi vendodhjen e mundshme të tij.
