Pesë ditë pas sekuestros preventive që gjykata vuri ndaj një objekti 10 - katësh që ndodhet në qytetin e Shkodrës, policia vuri në pranga pronarin e këtij objekti, 44-vjeçarin Bardhok Pllanaj nga fshati Shtoj i Vjetër.
Sipas prokurorisë, objekti në fjalë që kap vlerën e 2 milionë Eurove, është financuar nga të ardhura që dyshohet se janë përfituar si rrjedhojë e aktiviteteve kriminale që Pllanaj ka kryer më parë.
Nga hetimet ka rezultuar se 44-vjeçari e kishte nisur vite më parë ndërtimin e pallatit 10-katësh, por pa u pajisur me lejet përkatëse të lëshuara nga organet kompetente. Ndaj tij, Gjykata vendosi masën 'arrest me burg' për veprat penale të ?Pastrimit të parave?, ?Falsifikimit? dhe ?Ndërtim pa leje?.
Pllanaj nuk është një emër i panjohur për policinë. Një vit më parë ai u shpall në kërkim për trafik droge pas një operacioni në fshatin Vilun të Velipojës, ku u sekuestruan sasi të mëdha kanabisi. Rrjeti ku dyshohet se ishte i implikuar Pllanaj, akuzohej se kishte trafikuar rreth 3.5 ton kanabis drejt Siçilisë.
