Kryeministri Edi Rama ka zhvilluar një mbledhje online me Komitetin Teknik të Ekspertëve për situatën e Covid-19.
Rama tha se tashmë rruga është drejt hapjes thuajse të plotë dhe problem që duhet studiuar me kujdes është transporti publik ndërqytetas dhe urban.
Kreu i qeverisë tha se në ditët në vijim do të jemi tërësisht të ekspozuar ndaj virusit, ndaj kujdesi personal i secilit duhet të jetë tejet i lartë.
Nga ana tjetër doktori Tritan Kalo tha se deri sa të jetë në qarkullim një vaksinë, virusi do të jetë prezent.
Ai u shpreh se në vjeshtë nuk pritet që të ketë një shpërthim të Covid-19, por një përzierje të tij me viruset stinore që tashmë njihen.
Kalo u bën apel të gjithë qytetarëve që të mos neglizhojnë masat mbrojtëse dhe parandaluese që janë bëre me dije përgjatë gjithë kësaj periudhe.
Mjekja Silva Bino u shpreh se pozitiviteti i virusit në popullatën tonë është në një përqindje të ulët, jo më shumë se 5%. Ajo tha se kjo përqindje është një indikator shumë pozitiv dhe duhet bërë kujdes që të mos ndryshojë në vlera rritëse.
Bino tha se po punohet intensivisht për gjurmimin e rasteve aktive dhe se janë shtuar testimet pikërisht për gjetjen e tyre.
Ajo tha se po ritrajnohet stafet mjekësore dhe po përdoren metodika të reja, për gjetjen në kohë reale të kapjen në kohë reale të rasteve.
Kryetarja e Komitetit të Ekspertëve, zv/ministrja e Shëndetësisë Mira Rakacolli, theksoi se është e rëndësishme të studiohet a do të ketë apo jo një rishpërthim të virusit në muajt në vijim. /tvklan.al
