प्रसिद्ध संगीत दिग्दर्शक बप्पी लाहिरी यांनी मंगळवारी रात्री वयाच्या 69 व्या वर्षी अखेरचा श्वास घेतला. हिंदी चित्रपटसृष्टीत आपल्या हटक्या संगीताने बप्पी लाहिरी यांनी विशेष ओळख निर्माण केली. संगीतकार बप्पी लाहिरी यांच्या निधनाने चित्रपटसृष्टीवर शोककळा पसरली आहे. गुरुवारी सकाळी 10 वाजता विले पार्ले येथील पवन हंस या स्मशानभूमीमध्ये त्यांच्यावर अंत्यसंस्कार पार पडले. त्यांच्या निधनानंतर राजकीय, सामाजिक, बॉलिवूडसह सर्वच क्षेत्रातून श्रद्धांजली अर्पण केली जात आहे. यावेळी लाडक्या डिस्को किंगला निरोप देण्यासाठी अवघं बॉलिवूड लोटलं होतं. चाहत्यांनी मोठी गर्दी केली होती. अभिनेते शक्ती कपूर, विद्या बालन, भूषण कुमार, मिका सिंग, सुदेश भोसले, शान, उदित नारायण, ललित पंडित, यांनी यावेळी अंतिम दर्शन घेतलं. साश्रू नयनांनी लाहिरी कुटुंबिय, बॉलिवूडचे कलाकार आणि चाहत्यांनी आपल्या या लाडक्या 'डिस्को किंग'ला भावपूर्ण निरोप दिला. बप्पी लाहिरी अनंतात विलीन झाले असले तरी आठवणीच्या रुपात ते नेहमीच चाहत्यांच्या हृदयात राहणार आहेत.
