70 Years Doctor Completed 61 Degree Courses: చదువుకోవాలనే తపన ఉంటే చాలు వయస్సుతో సంబంధం ఉండదని నిరూపించాడు రాజమహేంద్రవరానికి చెందిన 70 ఏళ్ల డాక్టర్. ఈ రోజుల్లో చాలామంది యువత డిగ్రీ పాస్ అయ్యి పట్టా వస్తే సరిపోతుందని అభిప్రాయపడుతుంటారు. దానితో ఏదో ఒక ఉద్యోగం వస్తే చాలని భావిస్తుంటారు. కానీ రామారెడ్డి నిత్య విద్యార్థే. ఆయన తాజాగా కొన్ని కోర్సులు పూర్తి చేయడమే కాకుండా టాపర్గా నిలిచారు.
ఆయన వయసు 70 సంవత్సరాలు అయినా నిత్య విద్యార్థే. ఇప్పటి వరకు అందుకున్న డిగ్రీలు 61. అందులో మూడు డాక్టరేట్లు, ఐదు ఎల్ఎల్ఎంలు సహా ఎంబీఏ, ఎంసీఏ, ఎంటెక్, ఎంఏ, ఎంకామ్ ఇలా 50 డిగ్రీలు ఉన్నాయి. తాజాగా 11 కోర్సులు పూర్తి చేశారు. 8 కోర్సుల్లో టాపర్గా ఆయనే నిలిచారు. ఈ ఘనత సాధించింది రాజమహేంద్రవరానికి చెందిన ప్రముఖ మానసిక వైద్యులు డాక్టర్ కర్రి రామారెడ్డి. మంగళవారం రాజమహేంద్రవరంలో ఏర్పాటు చేసిన మీడియా సమావేశంలో ఆయన మాట్లాడారు.
