ಗಂಗಾವತಿ(ಕೊಪ್ಪಳ): ಧಾರಾಕಾರವಾಗಿ ಸುರಿದ ಮಳೆಯು ಬೆಟ್ಟ-ಗುಡ್ಡಗಳ ಮೇಲಿಳಿದು, ಹಾಲ್ನೊರೆಯುಕ್ಕಿಸುತ್ತಾ ಧುಮ್ಮಿಕ್ಕಿರುವ ದೃಶ್ಯ ಆನೆಗೊಂದಿಯ ಗವಿರಂಗನಾಥ ದೇಗುಲದ ಬಳಿ ಕಂಡು ಬಂತು.
ಥೇಟ್ ಮಲೆನಾಡಿನಲ್ಲಿರುವ ಜಲಪಾತದಂತೆ ಆನೆಗೊಂದಿ ಬಳಿಯೂ ಕೆಲಕಾಲ ಜಲಪಾತ ನಿರ್ಮಾಣವಾಗಿತ್ತು. ದಾರಿಹೋಕರು, ಪರಿಸರ ಪ್ರೇಮಿಗಳು ಕ್ಷಣಕಾಲ ನಿಂತು ಜಲಪಾತವನ್ನು ಕಣ್ತುಂಬಿಕೊಂಡರು. ಕೆಲವರು ತಮ್ಮ ಮೊಬೈಲ್ನಲ್ಲಿ ಈ ದೃಶ್ಯವನ್ನು ಸೆರೆ ಹಿಡಿದು ಸಂಭ್ರಮಿಸಿದರು.
ಗಂಗಾವತಿಯಿಂದ ಆನೆಗೊಂದಿ ಮಾರ್ಗವಾಗಿ ಅಂಜನಾದ್ರಿಗೆ ಹೋಗುವ ಮಾರ್ಗ ಮಧ್ಯದಲ್ಲಿ ಅಂದರೆ ಪಂಪಾಸರೋವರದ ಸಮೀಪ ಇರುವ ಗವಿರಂಗನಾಥ ದೇಗುಲದ ಬಳಿ ಈ ದೃಶ್ಯ ವೈಭವ ನಿರ್ಮಾಣವಾಗಿದೆ. ಕಳೆದ ಎರಡು ದಿನಗಳಿಂದ ಸುರಿಯುತ್ತಿರುವ ಮಳೆಯಿಂದಾಗಿ ಆಗಾಗ್ಗೆ ಈ ಜಲಪಾತ ನಿರ್ಮಾಣವಾಗುತ್ತದೆ.
ಬಂಡೆಗಳ ಮೇಲೆ ಮಳೆ ಜೋರಾಗಿ ಬಿದ್ದು ಅದು ಜಲಪಾತದಂತೆ ರಭಸವಾಗಿ ಹರಿಯುತ್ತದೆ. ಮಳೆ ಕಡಿಮೆಯಾಗುತ್ತಿದ್ದಂತೆಯೇ, ಕಣ್ಮರೆಯಾಗುವ ಜಲಪಾತ ಮತ್ತೆ ಮಳೆ ಜೋರಾಗುತಿದ್ದಂತೆ ಮತ್ತೆ ಧುಮ್ಮಿಕ್ಕಿ ಹರಿಯಲು ಆರಂಭವಾಗುತ್ತದೆ.
ಈ ದೃಶ್ಯವು ಗಂಗಾವತಿ-ಹುಲಗಿ ಮಧ್ಯೆ ಸಂಚರಿಸುವ ಪ್ರಯಾಣಿಕರಲ್ಲಿ, ಅದರಲ್ಲೂ ದ್ವಿಚಕ್ರ ವಾಹನಗಳ ಸವಾರರನ್ನು ಹೆಚ್ಚು ಆಕರ್ಷಿಸುತ್ತಿದೆ. ತಮ್ಮ ಬೈಕ್ಗಳನ್ನು ನಿಲ್ಲಿಸಿ ದೃಶ್ಯಗಳನ್ನು ಮೊಬೈಲ್ಗಳಲ್ಲಿ ಸೆರೆ ಹಿಡಿದು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಡುತ್ತಿದ್ದಾರೆ.
ಇದನ್ನೂ ಓದಿ: ವಿಶ್ವ ಪ್ರಸಿದ್ಧ ಗೌಡಗೆರೆ ಚಾಮುಂಡೇಶ್ವರಿ ಸನ್ನಿಧಿಯಲ್ಲಿ ಕಳೆಗಟ್ಟಿದ ಭೀಮನ ಅಮಾವಾಸ್ಯೆ ಸಂಭ್ರಮ
