Шест лица осомичени за трговија со дете
TV Telma Aleksandar Samardjiev
Случајот со незаконското посвојување на новороденче е длабоко вознемирувачки и претставува сериозно кршење на правата на детето. Доколку се потврдат наводите на истрагата, станува збор за злоупотреба на ранлива мајка и семејство кои се наоѓале во тешка социјална и економска состојба.
Ниту сиромаштијата, ниту очајот не смеат да бидат причина дете да стане предмет на договори, посредувања или финансиски трансакции. Секое дете има право на заштита, достоинство и постапки кои се спроведуваат исклучиво во негов најдобар интерес и согласно законските процедури.
Особено загрижува фактот што во случајот се споменуваат лица кои имале контакт со ранливи семејства и кои, наместо поддршка, наводно ја искористиле нивната состојба. Ова отвора прашања за ефикасноста на системот за рано препознавање на ризиците, за надзорот врз згрижувачките и другите форми на грижа, како и за улогата на сите институции кои биле должни да реагираат.
Потребна е темелна и транспарентна истрага која ќе ги утврди сите околности, мотиви и евентуални пропусти. Одговорност мора да има за секој што учествувал во евентуално организирање или посредување при незаконско посвојување, без разлика на неговата функција или позиција.
Истовремено, овој случај е предупредување дека државата мора многу повеќе да инвестира во поддршка на сиромашните и ранливите семејства. Центрите за социјална работа треба навремено да ги препознаваат ризиците, да обезбедуваат советување, материјална и психосоцијална поддршка и да спречат семејствата да станат жртви на манипулации и можни криминални мрежи.
Децата не се предмет на купување, продавање или договарање. Тие се носители на права и државата има обврска да обезбеди нивна целосна заштита.
Изјава Dragi Zmijanac Founder and President of the First Children's Embassy in the World Megjashi Republic of Macedonia
