CM Chandrababu Life Story on Micro Art : సీఎం చంద్రబాబుకు మహిత అనే యువతి ఆయన జీవిత చరిత్రను తెలిపే మైక్రో ఆర్ట్ను బహూకరించింది. అది చూసి మురిసిపోయిన చంద్రబాబు ఆమె నైపుణ్యాన్ని ప్రశంసించారు. జెన్జీ యువత ఇలానే ఉంటుందన్న ముఖ్యమంత్రి, సభకు వచ్చిన వారందరిచేత చప్పట్లు కొట్టించారు. యువతి కళా నైపుణ్యం అద్భుతమని కొనియాడారు. నేడు జాతీయ చేనేత దినోత్సవం సందర్భంగా బాపట్ల జిల్లా కొత్తపేటలో 'నేతన్న సేవలో' పథకాన్ని ముఖ్యమంత్రి ప్రారంభించారు.
మరోవైపు జాతీయ చేనేత దినోత్సవం పురస్కరించుకుని మగ్గంపై చంద్రబాబు ముఖచిత్రాన్ని నేసి తమ అభిమానం చాటారు శ్రీకాకుళం జిల్లాకు చెందిన చేనేత దంపతులు. ఎచ్చెర్ల నియోజకవర్గం లావేరు గ్రామంలోని పెద్దవీధి చెందిన బాసిన నాగేశ్వరరావు, లక్ష్మీ దంపతులు సుమారు నెల రోజుల పాటు శ్రమించి దీన్ని తయారు చేశారు. మీటర్ వెడల్పు, మీటర్ పొడవునా చంద్రబాబు ముఖచిత్రంతో పాటు ఆయన పేరు, స్థానిక ఎమ్మెల్యే, ఎంపీలు పేర్లు మగ్గంపై నేశారు. రెండు మీటర్ల పొడవునా ప్రత్యేక శాలువాను తయారు చేశారు. జాతీయ చేనేత దినోత్సవం సందర్భంగా సీఎం చంద్రబాబుకు బహుకరించేందుకు నెల రోజులు శ్రమించి ప్రత్యేకంగా తయారు చేసినట్లు చేనేత దంపతులు తెలిపారు.
