തൃശൂര്: റെസ്റ്റോറന്റ് ജീവനക്കാരനെ ബ്ലെയ്ഡ് കൊണ്ട് ആക്രമിച്ച് മെഡിക്കല് വിദ്യാര്ഥികള്. തലശേരി സ്വദേശിയായ റെസ്റ്റോറന്റ് മാനേജര് സതീഷിന് പരിക്കേറ്റു. തൃശൂര് ഗവ.മെഡിക്കല് കോളജിലെ വിദ്യാര്ഥികളാണ് മാനേജറെ ആക്രമിച്ചത്. ഇന്നലെ അത്താണി കെൽട്രോണിന് സമീപം അനീഷ് എന്ന വ്യക്തിയുടെ ഉടമസ്ഥതയിലുള്ള 'അൽമിയ' റസ്റ്റോറൻ്റിലാണ് സംഭവം. കോളജിലെ മൂന്ന് വിദ്യാര്ഥികളാണ് ആദ്യം റെസ്റ്റോറന്റില് എത്തിയത്. ഭക്ഷണം ഓര്ഡര് ചെയ്ത മൂവരും കൈയില് കരുതിയിരുന്ന ബിയറെടുത്ത് മേശപ്പുറത്ത് വച്ചു. സംഭവം ശ്രദ്ധയില്പ്പെട്ട ജീവനക്കാര് ഇവിടെ ലഹരി വസ്തുക്കള് ഉപയോഗിക്കാന് പാടില്ലെന്ന് പറഞ്ഞു. ജീവനക്കാരുടെ നിര്ദേശം വകവയ്ക്കാതെ സംഘം വീണ്ടും ബിയര് ബോട്ടില് തുറന്ന് അത് കഴിക്കാനൊരുങ്ങി. ഇതോടെ ജീവനക്കാര് ബോട്ടില് മോശപ്പുറത്ത് നിന്നും എടുത്തു മാറ്റി. ഇതോടെ വിദ്യാര്ഥികള് പ്രകോപിതരായെങ്കില് ചര്ച്ച ചെയ്ത് പ്രശ്നം തീര്പ്പാക്കി. പിന്നാലെ റെസ്റ്റോറന്റില് നിന്നും പോയ വിദ്യാര്ഥികള് അല്പ സമയത്തിന് ശേഷം എട്ട് വിദ്യാര്ഥികളുമായി തിരിച്ചെത്തി. മാനേജര് സതീഷിനെ ബ്ലെയ്ഡ് കൊണ്ട് ആക്രമിച്ചു. ആക്രമണത്തിൽ ഇയാളുടെ വലത് കൈയിൽ മുറിവേൽക്കുകയും ചെയ്തു. ഇതോടെ ഹോട്ടല് ഉടമ മെഡിക്കല് കോളജ് പൊലീസില് പരാതി നല്കി. കുറ്റക്കാര്ക്കെതിരെ കര്ശന നടപടി സ്വീകരിക്കണമെന്ന് ഹോട്ടല് ആന്ഡ് റെസ്റ്റോറന്റ് അസോസിയേഷന് ഭാരവാഹികള് ആവശ്യപ്പെട്ടു.
